നഷ്ടസ്വര്ഗ്ഗം
ലക്ഷ്യമില്ലാത്ത യാത്രയില് നട-
ന്നേറെക്ഷീണിച്ചൊരാ പാന്ഥന്
പാതവക്കിലെ പൂമരത്തണല്
പൂകി വിശ്രമിച്ചീടവേ
പുഷ്പഗന്ധവും പേറി വന്നൊരു
മാരുതന് മേനി പുല്കവേ
ബന്ധനങ്ങളില്ലാത്തൊരാ പാന്ഥന്
എല്ലാം മറന്നുറങ്ങവേ
രത്നനിര്മ്മിതമാം വിപഞ്ചിക
മീട്ടി വന്നൊരു ഗായിക
കോടിരത്നപ്രഭയോലും നറും -
പുഞ്ചിരി തൂകി നിന്നവള് .
ബന്ധനങ്ങളില്ലാത്തൊരാ പഥി -
കന്റെ മാനസമന്നവള്
രാഗസംഗീതമാലപിച്ചന്നു
ബന്ധിച്ചു മണി വീണയില്
തന്ത്രികള് മീട്ടി പാടി ഗായിക
തീര്ത്തവള് രാഗ മാലിക
രാഗ മാലിക കൊണ്ടാ പാന്ഥനെ
ബന്ധിച്ചു സന്നതാംഗിയാള്
മാലിക തീര്ക്കും ബന്ധനമെന്നാ
പാവം യാത്രികനോര്ത്തീലാ .
രാഗവീണയില് ദേവഗായിക
തീര്ത്തു സംഗീതസാഗരം .
ആ പ്രേമ സാഗരത്തില് നീന്തിയാ -
മോദമോടെയാ യാത്രികന് .
പൊന്നോളങ്ങളായ് പൊന്പുളകങ്ങള്
സ്വര്ഗ്ഗഗംഗയില് തീര്ത്തവള്
പുഞ്ചിരിയാലെ ദിവ്യപ്രകാശ -
മെങ്ങും വിടര്ത്തി സുന്ദരി
യാമാന്ത്യത്തിലാ സ്വപ്നസുന്ദരി
വീണയുമായ് പറന്നുപോയ്
അന്ധകാരം പടര്ന്നുവെങ്ങും വ -
ഴിയറിയാതെ യാത്രികന്
തീരം തേടിയാ സാഗരത്തില് കി -
ടന്നലയുന്നുണ്ടിപ്പോഴും .
രാഗവീണയില് ബന്ധിതമൊരാ
മാനസമിന്നും കേഴുന്നു
എന്നിനിക്കാണും ഞാനെന് കാമിനി
എന്നിനി കേള്ക്കും നിന്ഗാനം .
======കൃഷ്ണരാജ ശര്മ്മ ======
No comments:
Post a Comment